05/21/2010 | BIZIM QIRIM

Mayıs 18 1944 - Qırım cinayetidir. 1783 senesinden son halqımızğa nisbeten yapılğan cinayetçilik ve zülümnin soñ maqsadı - halqımıznıñ öz yurtundan sürgün etilmesidir. Qırım duşmanlarınıñ maqsadı - Qırım halqını ğayıp etmek edi. Olar bunı Qırımnı öz ellerine keçirmek içün yaptılar.

Amma Rabbimizge şükürler olsun ki, cesür halqımız Vatanında yaşamaq, ayaqqa turmaq ve öz kelecegini qurmaq içün tiz çökmeyip soñuna qadar kureşti. Allah bizge Qırımğa qaytmaq ve öz kelecegimizni Vatanımızda qurmağa imkân berdi.
Bu ğalebe pek qolay qazanamadıq. Bu ğalebe içün biz biñlernen şehit berdik. Bu ğalebe içün biñlernen baba-dedelerimiz apishaneler keçti ve horluq kördiler. Kelecek nesillerni milliy menfaatqa sadıq olğan birileri kibi terbiye ettiler. Kureşimizni devam ettik. Qırımğa qaytuv - bizim ğalebemiz oldı!

Ürmetli qartbaba-qartanalar, ana-babalar!

Bügün biz genç nesil olaraq, ihtiyar qartana-qartbabalarımızğa özümizniñ soñsuz minnetdarlığımıznı bildiremiz. Sağ oluñız. Sizniñ kureşinizniñ neticesi - Qırımda evlâtlarıznıñ saip olaraq yaşaması edi. Bügün biz Qırımdamız! Bügün biz yañı Qırım qurma peşine tüştik. Biz tarihimizni ve qahramanlarımıznı hatırlaymız. Sizniñ tarihte qaldırğan işiniz bizge bügün gurur ve ilham bere. Biz soñuna qadar küreşecegimizge söz beremiz!

Sayğılı genç nesil!

Tarihte qalğan saifeler bizge ders olmalı. Biz bundan hulâsa çıqarmalımız. Bizim nesilimizge başqa ve ağır vazife tüşe - milletimizni Vatanımızda tiklemektir! Bu vazife qolay degil. Amma bu yapılabilecek bir vazifedir. Bügün bir avuç olıp biz kelecegimiz içün çalışmalımız. Bu kureşte bizim temel ve esaslarımız doğru olmalı. Biz dinimizge, ürf-adetimizge sarılıp doğru ve emin adımlar atmalımız. Vatanımıznıñ kelecegi bizim mesuliyetimizdedir. Tarihte bu Qırım içün qan töküldi, ğurbetlik ayat keçirildi. Biz buñı yahşı bilmelimiz. Kelecek artıq bizge bağlıdır.

Mayıs 18 1944 qurbanlarını, çet ellerde qalğan semetdeşlerimizniñ ruhuna dua oquymız. Biz hatırlaymız. Biz tarihimizden ders alamız.

Allah bizge yardımcı olsun!

BQ

http://bizimqirim.org/qr/page.php?id=1