МАЙДАН - За вільну людину у вільній країні


Архіви Форумів Майдану

Топонимикамыз акъкъында

01/28/2009 | Брат-1
Эр шей озь арекетимизге багълы24 Янв 2009 | Миллий арекет

Топонимикамыз акъкъында

http://www.qirim.info/?p=955

Къырым, Украина ве башкъа девлетлернинъ сакинлери 1945 сенеси август 21-де РСФСР Юкъары Шурасы Президиумынынъ Ферманы муджиби Къырымнынъ кой шуралары ве эали яшагъан 329 нокътасынынъ адлары денъиштирильгенини бильмек кереклер. Коммунист фиркъасы ве совет укюмети тек бир халкъны дегиль, атта инсанларгъа ишанч ве садакъат иле юзлернен йыл хызмет эткен, тамыр халкъындан оксюз къалгъан ерлерни де насыл ёкъ эткенининъ делиллери чокъ.

Сюргюнлик ерлеринден догъмуш топра-гъына 280 бинъден зияде къырымтатар къайтып кельгенини козь огюне аларакъ, чокъ соз-май, башкъа меселелернен бир сырада Миллий Меджлис ёлбашчылыгъында Къырымнынъ эвельки топонимикасыны гъайрыдан тиклемек меселесинен де огърашмакъ керекмиз. Эгер биз бу ишни шимди япмасакъ, 10-15 йылдан сонъ, буны кимсе талап этмез. Бу иште семетдешлеримизден бириси, хусусан уйкен несиль, лякъайд къалмамалы. Къырымнынъ эвельки топонимикасы ана тили киби, къырымтатар халкъынынъ миллет оларакъ сакъланып къалув меселесинде буюк роль ойнамакъта.

Сонъки 5 йыл ичинде Къырымнынъ топонимикасыны денъиштирмек чаресини огренмек макъсадынен Къырым везирлер Шурасы тарафындан комиссия тайинленген эди, лякин бу комиссия бир шей япмады. Кечкен сене Украина Юкъары Радасынынъ депутаты О. Доний «Къырымнынъ эвельки топонимикасы тикленмели» деген лейихасына профильный комитеттеки депутатлар къолтутмадылар.

Анълашылгъанына коре бу куньгедже укюмет тарафындан бу меселеде бир шей япылмады. Онынъ ичюн биз озюмиз арекет этмелимиз.

Базы ерлерде япылгъаны киби, Къырымнынъ кой ве районларынынъ шимдики адларынен бир сырада оларнынъ эски адларыны язып, тахталар ерлештирмек акциясыны якъын вакъытта кечирмек керек. Эбет, къаршылыкъ, наразылыкълар олур, атта базы ерлерде тахталарны къыргъанлар да тапылыр, амма биз сабыр-чыдамнен анълатув ишлерини алып барып, озь ишимизни япмакъ, макъсадымызгъа иришмек керекмиз.

Мен теклиф эткен бу ёл чокъ масрафлар талап этмейджек. Джедвель тахталарыны региональ меджлислерде бир чешит (однотипно) этип азырламакъ мумкюн. Бундан да гъайры, юкъарыда анъылгъан Ферман муджиби денъиштирильген адларнынъ джедвелини чокълаштырып, тешвикъат материалы оларакъ, шеэр ве район мемуриетлерине, региональ ве ерли меджлислерге ёлламакъ лязим.

Кой ве шеэрлернинъ эски адлары язылгъан тахталарны я да демирбетон диреклерини Къырым сакинлери ве онынъ мусафирлерине рухиет ве малюмат джеэттен 2-3 йыл ичинде япаджакъ тесирининъ нетиджелерини тасавур этмек о къадар къыйын дегиль. Бу акция илериде Къырымнынъ топонимикасыны ресмий суретте тиклев ишинде белли бир мувафакъиетлерге иришмек ичюн хызмет этер, иншалла.

Музаир РЕШИТОВ,

Акъмесджит шеэри.


Copyleft (C) maidan.org.ua - 2000-2021. Сайт розповсюджується згідно GNU Free Documentation License.
Архів пітримує Громадська організація Інформаційний центр "Майдан Моніторинг". E-mail: news@maidan.org.ua